Գինով համեմված տանձը դա պարզության և խոհարարական նրբաճաշակության համադրություն է: Ֆրանսիական աղանդերի հիմնական բաղադրիչներն են` տանձը և գինին: Տանձը պետք է լինի պինդ ոչ գերհասած, քանի որ պատրաստման ընթացքում վերջինս կդառնա չափազանց փխրուն և կկորցնի իր արտաքին տեսքը: Այդ իսկ պատճառով նշված աղանդերի պատրաստման համար առավել հարմար են տանձի Կոնֆերանս, Վիլիամս տեսակները:

Տանձը եփում են կարմիր կամ սպիտակ գինու մեջ: Ամենակարևորը` օգտագործել բարձրորակ գինի, քանի որ այն անմիջապես ազդում է աղանդի համային հատկանիշների վրա: Շաքարավազի փոխարեն կարելի է օգտագործել մեղր: Համային հատկանիշները առավել արտահայտիչ դարձնելու համար գինու մեջ ավելացնում են մրգեր: Հիմնականում նարինջ, կիտրոն կամ հատապտուղներ: Ի դեպ, ալկոհոլը կարելի է մի փոքր նոսրացնել նարնջի, խնձորի և նռան հյութերի միջոցով:

Նարնջի կեղևը քերել` փորձելով սպիտակ հատվածը չվնասել: Նարինջը բաժանել մասերի և հյութ քամել:

• Կաթսայի մեջ լցնել գինին, նարնջի հյութը, շաքարավազը, մեխակը , անիսոնը, նարնջի կեղևը և դարչնի փայտիկը:
• Կաթսան դնել կրակի վրա և հասցնել գրեթե եռման աստիճանի, ապա հանել կրակի վրայից:
• Գինին քամել` հանելով համեմունքերի սերմերը: Միայն թողնել նարնջի կեղևը և դարչնի փայտիկը:
• Հեռացնել տանձի կեղևը և փոքր-ինչ կտրել տանձի ստորին հատվածը:

Մաքրած տանձերը դնել համեմված գինու խառնուրդում: Եփել միջին կրակով մոտավորապես 15-20 րոպե:

• Կաթսան կրակի վրայից վերցնել, հանել տանձերը և թողնել ուղղահայաց վիճակում: Առանձին զովացնել գինու խառնուրդը և տանձերը:
• Այնուհետև տանձերը դարձյալ դնել գինու խառնուրդի մեջ 40-60 րոպե, որպեսզի վերջիններս լրացուցիչ կլանեն գինու և համեմունքների համային հատկանիշները:
• Տանձերը մատուցել պաղպաղակի և հատապտուղների հետ :